Isa 9 | NdeIBE | STEP | Kodwa-ke akusayikuba khona ukudangala kulabo ababesosizini. Ezinsukwini ezedlulayo walithobisa ilizwe likaZebhuluni lelizwe likaNafthali. Kodwa ezinsukwini ezizayo uzayipha udumo iGalile yabezizweni, endleleni yasolwandle kulandelwa uJodani

Isaiah 9

Sizalelwe umntwana

1 Kodwa-ke akusayikuba khona ukudangala kulabo ababesosizini. Ezinsukwini ezedlulayo walithobisa ilizwe likaZebhuluni lelizwe likaNafthali. Kodwa ezinsukwini ezizayo uzayipha udumo iGalile yabezizweni, endleleni yasolwandle kulandelwa uJodani –

2 Abantu abahamba emnyameni sebebone ukukhanya okukhulu; kulabo abahlala elizweni lethunzi lokufa ukukhanya sekukhanyisile.

3 Usikhulisile isizwe wandisa intokozo yabo; bayathokoza phambi kwakho njengabantu bethokoza ekuvuneni, njengabantu bethokoza lapho besaba impango.

4 Ngoba njengamhla wokwehlulwa kukaMidiyani usulephule ijogwe elibasindayo, umgoqo onqume emahlombe abo, intonga yomcindezeli wabo.

5 Lonke inyathela lebutho elisetshenziswe empini, kanye lazo zonke izigqoko ezigiqwe egazini kuzakuya ekutshisweni; kuzakuba ngokokubasisa umlilo.

6 Ngoba sizalelwe umntwana, siphiwe indodana, umbuso uzakuba phezu kwamahlombe akhe. Uzabizwa ngokuthi uMeluleki Omangalisayo, uNkulunkulu uSomandla, uBaba Waphakade, iNkosana yokuThula.

7 Ukwanda kombuso wakhe lokuthula akuyikuba lomkhawulo. Uzabusa esihlalweni sobukhosi sikaDavida laphezu kombuso wakhe, ewumisa njalo ewuqinisa ngokufaneleyo langokulunga, kusukela ngalesisikhathi kusiya phambili, kuze kube nininini. Ukutshisekela kukaJehova uSomandla kuzakufeza lokhu.

UJehova Uthukuthelele Abako-Israyeli

8 UJehova usethumele ilizwi lesixwayiso kuJakhobe; lizakwehlela phezu kuka-Israyeli.

9 Abantu bonke bazakwazi – u-Efrayimi labakhele eSamariya – abathi ngokuzigqaja langokuzikhukhumeza kwenhliziyo,

10 “Izitina sezidilikele phansi kodwa sizakwakha njalo ngamatshe abaziweyo; imikhiwa isiganyulelwe phansi kodwa sizafaka imisedari endaweni yayo.”

11 Kodwa uJehova usebaqinisele izitha zikaRezini, njalo usetshotshozele izitha zabo.

12 Ama-Aramu avela empumalanga lamaFilisti avela entshonalanga asedle u-Israyeli ngomlomo ovulekileyo. Kodwa kukho konke lokhu, ukuthukuthela kwakhe akupheli, Isandla sakhe silokhu siphakanyisiwe.

13 Kodwa abantu abakabuyeli kuye owabatshayayo. loba badinge uJehova uSomandla.

14 Ngakho uJehova uzaquma ko-Israyeli ikhanda lomsila, ugatsha lwelala lomhlanga ngasuku lunye;

15 abadala lezikhulu balikhanda, abaphrofethi abafundisa amanga bangumsila.

16 Labo abakhokhela abantu laba bayabalahlekisa, labo abakhokhelwayo bayedukiswa.

17 Ngakho uJehova kayikuthokoza ngezinsizwa zabo njalo abangalaboyise labafelokazi kayikuba lozwelo kubo, ngoba bonke bayameyisa uNkulunkulu, njalo babi; imilomo yonke ikhuluma amanyala. Kukho konke lokhu, ukuthukuthela kwakhe akupheli, isandla sakhe silokhu siphakanyisiwe.

18 Ngeqiniso ububi butshisa njengomlilo, budla ukhula lameva, buthungela izixuku zehlathi zivuthe amalangabi izikhatha zentuthu ziqonga zisiya phezulu.

19 Ngolaka lukaJehova uSomandla ilizwe lizatshiswa, abantu bazakuba zinkuni zomlilo, kakho ozaphephisa umfowabo.

20 Bazaqeda kwesokudla kodwa babe belokhu belambile; bazakudla kwesokhohlo, kodwa bangasuthi. Omunye lomunye uzakudla abantwabakhe:

21 UManase uzakudla u-Efrayimi, u-Efrayimi adle uManase; bobabili bazamelana loJuda. Kukho konke lokhu, ukuthukuthela kwakhe akupheli, isandla sakhe silokhu siphakanyisiwe.